繼續同史友們介紹世界各地嘅最新考古發現，繼早排考古團隊喺胡夫金字塔發現到一條秘道之後，埃及又再次有重大嘅考古發現，今次係搵到一隻「迷你版」獅身人面像！
考古團隊喺埃及南部嘅哈托爾神廟附近展開考古發掘，哈托爾神廟一帶以往都係保存最完善嘅埃及遺址之一，而呢次就成功喺一座雙層墓穴發掘出一尊獅身人面像，雕像臉上仲帶有微笑以及兩個酒窩，雕刻精細，係相當罕見嘅造型。
咁到底點解呢尊獅身人面像會有咁「奇怪」嘅造型呢？考古團隊就按照面相分析，相信設計者係想以非寫實方式刻劃一位古羅馬皇帝面貌，而佢哋推測呢位主角正係公元41年到54年將古羅馬帝國版圖拓展到北非嘅克勞迪烏斯（Claudius）。而其實連帶發現嘅文物仲有一塊石碑，只要考古團隊充分解讀到以上嘅通俗文字、象形文字，所有真相就會浮現！
原圖嚟自網絡