話說最近有套叫《風再起時》嘅電影上映，嘩嘩嘩！個卡士就真係不得了，有影帝梁朝偉，又有天王郭富城，仲有譚耀文同周文健。不過咁，個故事又係講六七十年代四大探長，呢個題材真係睇足三十幾年，你唔悶我都悶啦！
「四大探長」呢個電影題材，响九十年代可以話非常熱門，特別係劉德華扮雷洛真係深入民心。响呢個系列當中，都會提及總華探長呢個職位，咁到底又係乜嘢嚟呢？總華探長，又叫華人總探長，正稱為刑事偵緝甲級高級警長，係以往華人响香港警察系統中嘅最高職位。响1949年，當時警察隊增設咗總探長職級，直接向獨立運作嘅刑事偵緝處處長負責。雖然當時警隊仍然係以洋警官權力最大，但由於華人總探長們都熟悉社會情況，所以洋人警司們都要靠佢哋先可以搞掂好多嘢，令華人總探長係位低權重。不過，當時警隊貪污成風，加上同當時黑幫有利益關係，繼而有黃賭毒充斥社會嘅局面。
至於經常响電影被影射嘅呂樂，就係當年勢力最大嘅華人總探長，而藍江係另一位華人總探長，地位同呂樂相若，至於電影成日話係四大探長之列嘅韓森同顏雄，有人就話佢兩個其實助手級人馬，唔可以同呂藍二人相提並論。
原圖嚟自網絡