嘩嘩嘩，真係歷史性嘅一刻，第95屆奧斯卡頒獎典禮喺香港時間今日上午舉行，早前憑《奇異女俠玩救宇宙》(Everything Everywhere All At Once)橫掃多個獎項嘅女主角楊紫瓊不負眾望，成功奪得「最佳女主角」獎，真係華人之光。楊紫瓊大熱奪獎，亦都意味住佢成為歷史上首位亞裔、華裔奧斯卡影后。
喺提到得獎感言嘅時候，楊紫瓊除咗感謝天下間嘅母親之外，喺香港建立自己電影事業嘅佢亦都不忘感謝香港電影。出生喺馬來西亞一個富裕家庭嘅楊紫瓊自小就受到良好教育，最初亦都係主修芭蕾舞，但因為傷患而被迫轉行。喺套得馬來西亞小姐冠軍之後，佢就獲邀到香港演出與周潤發合拍廣告片，自此就同香港影圈結下不解緣。其後佢亦都憑住《皇家師姐》、《貓頭鷹與小飛象》、《警察故事III》等香港電影爆紅，仲成為香港頭號女打星。
亦都因為佢同香港之間有住咁樣嘅經歷，楊紫瓊得獎時亦都表示「多謝香港電影，讓我站在這個巨人的肩膊上」，同時佢亦都對所有亞裔群眾表示「為所有世界上看似我的男孩與女孩，這是希望與無限可能的燈塔」，真係相當令人鼓舞！
原圖嚟自網絡