繼續同史友們介紹我國最新嘅考古發現，近日河南安陽嘅考古人員就喺位於安陽八里莊發現到距今7,800到7,400年嘅遺址。據考古團隊推斷，呢個遺址極有可能係以裴李崗文化為主體，兼具磁山文化因素嘅新石器中期聚落遺址，阿史今次就同大家介紹下啦！
喺近日嘅「2022河南考古新發現論壇」當中，河南安陽市文物考古研究所工作人員就指出喺進行建發掘過程中，就意外搵到上述嘅遺址。整個遺址呈不規則橢圓形，現存面積2.7萬平方公尺。，喺遺址當中仲鑽探出一條寬約100公尺嘅古河道。
經過進一步考察，考古團隊就表示遺址區內地層堆積清晰，文化遺存豐富，出土咗唔少有紋飾夾砂陶器、紅燒土牆體殘塊、石器等，其中唔少仲係可以發掘到裴李崗文化層。單憑以上嘅發現，考古人員就初步判斷八里莊遺址先民為依河而居。而呢個遺址位置就係所知裴李崗文化分佈最北界，佢嘅存在更加為安陽地區乃至整個豫北地區新石器時代中期文化填補重要嘅空白。
原圖嚟自網絡