繼續同史友們介紹一啲有趣嘅歷史謎題，「九子奪嫡」呢件歷史事件相信唔少史友都聽過，而作為一代明君嘅康熙其實實際上都預想過會有呢種情況發生，事關喺佢決定繼位人之時，兒子之間都已經相互明爭暗鬥，所以一直都令到佢相當苦惱。而喺康熙死之前，其實佢就曾經同雍正講過，喺佢死後有兩個人係唔可以留低，阿史今次就同大家講一講啦！
其實喺康熙晚年之時，對於兒子之間嘅明爭暗鬥已經好煩惱，而喺康熙四十七年，佢就廢黜胤礽太子之位，而皇長子胤褆亦都因為「用魘術魘廢太子」而被奪爵軟禁。雖然後來胤礽太子之位得到復立，但喺康熙五十一年亦都被再次廢黜。由以上舉動可以，康熙對於呢兩個仔已經係相當失望，但到底有冇話過呢兩個人「留不得」呢？
原來喺由雍正所寫嘅《大義覺迷錄》當中，就有提到「大阿哥殘暴橫肆，暗行鎮魘，冀奪儲位，二阿哥昏亂失德。皇考為宗廟社稷計，將二人禁錮」。但實情唔單止咁，當中甚至仲指出過康熙仲曾下令「朕若不諱；二人斷不可留」。之不過雖然話就話康熙曾經咁樣講過，但雍正最終都係考慮到胤礽曾經做過三十幾年太子，勢力龐大、黨羽林立，連同胤褆一樣佢都加以善待，只係軟禁起嚟，最終都冇殺死佢哋。
原圖嚟自網絡