食鹽，喺今時今日嚟講可以話係一種只要有錢就買到嘅日常用品，由平到貴都有好多唔同種類。之不過，喺古代社會嚟講，呢種日常用品就係會被政府列為專賣，販賣私鹽甚至仲係一種大罪，到底當中有咩原因？阿史今次就同大家講一講啦！
關於鹽嘅起源其實歷史上都有唔少具有神話色彩嘅故事，例如就好似「夙沙煮海」咁樣，但最古法嘅制鹽就係通過「煮鹵法」而產出，早喺周朝開始政府就已經對呢種民生必需品進行管制，並且有專門掌管鹽政官員「鹽人」，佢哋嘅工作就係「掌鹽之政令，以共百事之鹽，祭祀共其苦鹽散鹽，賔客共其形鹽散鹽，王之膳羞共飴鹽」。換言之，即係同鹽相關嘅祭祀、待客事務都由佢哋管晒。
咁到底點解歷代嘅政府都要對鹽進行管制呢？其一，正因為鹽係民生必需品，所以對食鹽進行專賣就可以確保到國家有穩建嘅稅收，呢啲收入就可以用作供養軍隊，為國家進行版圖上嘅擴張，春秋時期嘅晉國、戰國時嘅魏國都係因為食鹽而致富，繼而成為強國。
至於另一個原因就係，由於食鹽嘅收入可以好高，如果唔進行專賣，販賣私鹽嘅人士喺得到大量資金後，如果選擇謀反就會相當之難應對。所以，鹽喺古代嚟講真係可以影響一個國家嘅命脈！
原圖嚟自網絡