俗語有話「寧可食無菜,不可食無湯。」講到廣東人嘅飲食文化,飲老火湯都可以話係其中一個標誌,咁史友們又有無諗過點解我哋平時生活會飲老火湯呢?
老火湯係以慢火煲煮嘅湯水,好多時會放藥材入去,所以老火湯有補身補健功效。至於點解廣東人會鍾意煲湯飲湯呢?其實係同嶺南一帶嘅氣候有關。據史書記載:「嶺南之地,暑濕所居。粵人篤信湯有清熱去火之效,故飲食中不可無湯」。相對北方,廣東一帶天氣較為濕熱,所以廣東人會通過飲湯去濕解毒,清一清身體中嘅熱毒。仲有一個原因,就係响炎熱之時,有湯水濕濕口進食會舒服啲,冬天時有碗暖湯又可以暖下個身。
亦有人話,廣東人煲湯其實係維繋家庭成員關係一種方法,因為廣東婦女通過一煲靚湯,令家庭各成員可以開開心心咁食飯。諗落,阿媽煲嘅靚湯又真係成日都會掛住。
原圖嚟自網絡