上次阿史介紹講過,話潘金蓮其實係善良賢惠、勤勞仁義嘅婦女,只係俾小人寫成為淫婦,其實類似情況仲有一個人,佢就係陳世美。
相信睇過電視劇《包青天》嘅史友,都知道陳世美為咗做駙馬爺,唔認老婆,最後被包青天開鍘殺咗。不過,有文化研究學者就考究過,响歷史上其實係無陳世美呢個人,而陳世英原型其實係清初官員陳年穀。根據《湖北歷史人物辭典》記載、陳年穀字熟美,佢妻子叫秦馨蓮,不過陳熟美無搞外遇,亦無做駙馬,夫妻亦非常恩愛,絕非負心渣男。不過,為官嘅陳年穀就因為得罪咗一個想攀附佢嘅文人,就將陳熟美同秦馨蓮變成咗陳世美唔要秦馨蓮嘅故事,以作報復。
不過有人就話呢個考究唔多準確,因為陳世美最早出現於明代戲曲《秦氏還魂配世美》當中,又點會有一個清代官員穿越呢?關於呢個講法,阿史就搵到個合理解釋,因為今時今日大家認知嘅故事唔係最初版本,而係經過多年加加減減而來,唔係出於一人之手,所以去到清代個陣就將陳熟美同秦馨蓮呢個元素加入其中。如果從呢個角度出發,其實都合邏輯。
原圖:《包青天》劇照