喺古代中國嘅封建社會當中,要喺固有嘅傳統思想當中掙脫並對科學進行研究,本來就已經係一件困難嘅事,而如果做到呢件事嘅竟然係一位女性,咁就真係奇跡當中嘅奇跡,而歷史上我國真係曾經出過一位傳奇嘅女科學家,佢就係王貞儀。
王貞儀出生喺清乾隆三十三年嘅一個書香門第,祖父王者輔曾任豐城知縣。而喺王貞儀 11歲之時,因為祖父離世父親就帶同佢千里奔喪,就係因為呢次機會令到佢喺5年之間就讀晒祖父珍藏嘅書籍。而喺呢段期間,佢亦都跟隨父親及祖母四處行醫,直到18歲先至返到南京定居,專心研究數學。
咁到底呢位女子又係點樣成為科學家呢?原來當佢開始研究數理之時,亦都開始接觸西方科學,研究內容包含三角函數與勾股定理、梅氏算學,甚至仲喺自己作品《葬經闢異序》當中反對迷信風水;而喺佢嘅作品《歲差日至辨疑》、《黃赤二道辯》、《地圓論》當中,就以簡陋器材了解月食奧秘,解釋呢啲天文現象並非「不祥之兆」,所有舉動喺當時嚟講都係相當大膽。
雖然當時唔少人都批評王貞儀「失閨閣本來面目」,但佢嘅成就即使嚟到近代,都仍然獲得國際天文學聯合會(IAU)嘅讚揚,並且以佢之名命名金星上新發現隕石坑,真係相當巴閉!
原圖嚟自網絡