上次介紹咗上世紀九十年代响深圳出現嘅「世界之窗」，通過微縮影景區令遊客們可以一日之內「遊遍全世界」。其實類似概念，响八十年代已經實現咗，仲要同樣响深圳出現。

阿史講緊嘅，就係位於深圳嘅「錦繡中華」。「錦繡中華」位處中國廣東省深圳市南山區華僑城，創建於1988年，係由深圳錦繡中華發展有限公司營運。「錦繡中華」最出名自然係微縮影區，據了解當年有領導去完外國考察後，見到外國有微縮影區嘅主題公園，於是就响深圳搞一個，令深圳有一個主題公園式嘅景點，「錦繡中華」就因此而誕生。

「一步邁進歷史，一天遊遍中華」就係當年「錦繡中華」嘅宣傳口號，園區結集咗內地近百處著名景點，自然風光同人文歷史精粹都包含其中，包括萬里長城、秦陵兵馬俑、故宮、樂山大佛、圓明園、敦煌莫高窟、布達拉宮、石林、黃山、黃果樹瀑布等；遊客們買咗票就可以行晒內地各大景點。當時响內地引起好大迴響，境內外遊客不絕。亦因為「錦繡中華」嘅成功，後嚟就出現咗「世界之窗」。

原圖嚟自網絡