唐朝人過春天到底有幾精彩？

喺一年四季當中，春天可以話係氣候最舒適、風景最宜人嘅日子，而喺古代嘅詩作當中，呢個季節亦都有唔少美好嘅含義，古人亦都會喺呢個季節進行唔少慶祝活動，阿史今次就同大家介紹一下唐朝嘅人係點樣過春天。

唐朝嘅人，上至皇室大臣，下至平民都相當重視春天呢個季節。就好似皇帝與大臣之間就會玩上好多關於賞花嘅遊戲，以自己嘅知識歌頌春花，例如宮中學士蘇頲曾經與唐玄宗遊覽宮廷中春花之時寫下「飛埃結紅霧，游蓋飄青雲」一句；而喺街頭之上唐朝女子亦都會將鮮花放到自己嘅頭上，同路人實行「鬥花」，當日就會比出邊個先係「花魁」。

除此之外，唐朝人亦都好鍾意宴會。喺宮中每逢春天都會有春日宴會，皇帝就會藉此邀請勞累多日嘅官員；至於民間亦都會舉行宴會，喺花樹之下就會開酒桌，放上好酒器皿，遊俠就會同路人相飲為樂；女子就會舉行「裙幄宴」，真係相當歡樂。