之前阿史都介紹咗唔少改革開放初期出現嘅景點，講到遊樂場除咗深圳外，响八十年代廣州都有出現，當年廣州一個遊樂場更紅遍全國，呢個遊樂場就係東方樂園。
响1985年開業嘅東方樂園，號稱當時內地最大型現代遊樂場所，更巴閉嘅係佢仲係國際遊樂場協會第一個中國會員，當年創下一天接待10萬遊客嘅紀錄，呢個紀錄响打後20年都無一家內地遊樂園能突破。呢個樂園有50幾個遊樂設施，當中唔少仲係當時响境外引進嘅遊樂項目，好似雙環過山車、摩天輪等。講到呢個東方樂園，唔少去過嘅人記得除咗係門口嘅五羊像外，仲有就係遍佈北上南下火車嘅廣告，好多外地人第一次到廣州玩就一定會去東方樂園。
可惜，東方樂園熱潮就响1994年開始走下坡，到咗2004年倒閉結業，又一時代嘅眼淚。
原圖嚟自網絡