提起「挾天子以令諸侯」一詞，相信史友們腦海中第一時間諗起嘅就係曹操挾漢獻帝以令諸侯，但其實做出呢種事嘅人唔止得一個，而曹操亦都唔係最先嘅一個，喺東周初期就已經有位「春秋小霸」鄭莊公做過呢件事，阿史今次就同大家講一講啦！
鄭莊公喺鄭國歷史上在位42年，喺佢管治之下鄭國經濟發達，國內情況欣欣向榮，甚至有後世學者認為，喺佢管治之時嘅鄭國係可以堪稱「春秋小霸」。咁到底點解呢位春秋霸主又會忽然選擇「挾天子以令諸侯」呢？
原來喺鄭莊公即位後，鄭莊公之弟叔段勾結武姜發動叛亂，叔段勢力龐大，鄭國局勢一度危急，但由於鄭莊公早有準備，成功攻打到叔段根據地「京城」，叔段最終失敗自殺，叔段之子公孫滑逃至衛國蠱惑衛桓公報仇，並且佔領咗廩延。得知消息後，由於鄭國地理位置鄰近周天子洛邑，而鄭莊公本身亦係周天子卿士，於是鄭莊公攛掇周天子一同出兵討伐，佢借周天子之名聯合虢國、邾國攻打衛國，消除敵人之餘又壯大自己實力，當中係存在相當明顯嘅意圖。
而喺周平王在位晚期，其實鄭國實力已經相當強大，即使周平王想扶持虢公打壓鄭莊公，但最後都係無計可施，甚至仲逼到天子同作為諸候嘅鄭莊公交換質子以換取安全，鄭莊公真係「挾天子以令諸侯」第一人！
原圖嚟自網絡