繼續同史友們介紹我國最新嘅考古成果，日前河南就公佈咗2022年度河南五大考古新發現，其中位於洛陽孟津朱倉北朝墓嘅考古文物就堪稱係國寶級嘅文物，阿史今次就同大家講一講啦！
日前入選2022年度河南五大考古新發現嘅洛陽孟津朱倉北朝墓，據考古團隊進一步分析同研究後，整座北朝墓就係由三座墓葬組成，初步推測墓葬年代係北魏末年至東魏時期，而喺其中兩座墓葬當中考古團隊就有驚人嘅發現。據了解其中兩座內考古團隊就各發現到一套規模較大、佈局嚴謹嘅圍屏石棺床，係洛陽首次考古出土嘅北朝圍屏石棺床。喺石棺床上，仲發現到每個圍屏石棺床有4塊石屏風，每塊石屏風各有3幅線刻圖像，都係以中原傳統孝子、高士故事，以及墓主人出行故事為主題，唔單止係相當罕有嘅發現，更加為北魏時期繪畫藝術提供新嘅實物資料。
原圖嚟自網絡