繼續同史友們介紹我國最新嘅考古成果，近日2022年度全國十大考古新發現就喺北京揭曉，當中除咗有山東臨淄趙家徐姚遺址、河南安陽殷墟商王陵及周邊遺存等項目入選年度十大考古發現之外，仲有百萬年前湖北十堰學堂梁子遺址嘅「鄖縣人」頭骨項目入選其中，阿史今次就同大家講一講啦！
如果係接年代嚟排序，今次嘅十大考古成果就係以湖北十堰學堂梁子遺址、山東臨淄趙家徐姚遺址、山西興縣碧村遺址、河南偃師二里頭都邑多網格式布局為先，咁到底湖北十堰學堂梁子遺址點解會咁萬眾注目呢？
位於湖北省十堰市鄖陽區青曲鎮彌陀寺村嘅學堂梁子遺址其實早喺1989年、1990年就已經因為發現到兩具直立人頭骨化石（俗稱「鄖縣人」）而喺考古學界知名，呢個遺址亦都一直係一處集古人類化石、古動物化石和石製品三位一體的重要舊石器時代遺址。而相信考古團隊諗都冇諗過，喺發現「鄖縣人」1號頭骨之後嘅33年後嘅同一日，考古團隊竟然可以巧合地搵到「鄖縣人」3號頭骨。
「鄖縣人」3號頭骨目前唔單止係我國重大嘅考古發現，放眼全球考古學界都係一個重大發現，佢嘅出現唔單止提供準確地層和共存關係，仲為實證百萬年嘅人類史提供了非常重要的資料。
原圖嚟自網絡