就華南地區嘅飲食文化嚟講，「雞」固然就係各大菜系當中嘅主角，但近日嘅考古研究就發現，其實華南地區嘅人類食蛇嚟講都有幾千年嘅歷史，阿史今次就同大家講一講啦！
近日，中國科學院古脊椎動物與古人類研究所、廣西文物保護與考古研究所公布喺廣西左江流域開展發掘嘅研究成果。據研究團隊介紹，今次喺距今約6,000年寶劍山遺址以及大灣遺址中，就出土到好多蛇類骨骼材料，當中包括一塊中段蟒蛇類齒骨及大量蛇類脊椎骨。而通過將呢啲蛇類骨骼同現代東亞地區現生蛇類骨骼標本進行形態學對比，就基本可以肯定有緬甸蟒、眼鏡王蛇、百花錦蛇等三種分布喺廣西嘅蛇類。
咁到底點解幾千年前會有咁密集嘅蛇骨呢？原來喺呢啲蛇骨表面係存在疑似燒灼痕以及人工切割或敲砸痕跡，反映住呢啲蛇類都係被人類獵食後殘留，而烹調嘅方式仲更加可能係燒烤。換言之，通過呢次研究就可以發現，華南地區人類獵食蛇類嘅歷史可以上溯至6,000年前新石器時代。
原圖嚟自網絡