以前介紹廣州歷史果陣,講過早响隋唐甚至以前朝代,廣州已經係對外貿易港,更有唔少外國人出現响呢個城市。有趣嘅係,响唐代廣州有外國人嘅官員。
嚴格上嚟講,上述所謂「官員」其實係當時廣州地方官員委任當地外國人去管理外國人。話說响唐文宗時期,廣州原本係「蠻漢雜居」,後嚟變革為「蠻漢分居」,當時主要聚居响廣州嘅都係阿拉伯人,而佢哋聚居之地就叫做「蕃坊」。而响九世紀有一位阿拉伯商人叫蘇萊曼,就將當時蕃坊情況描寫咗响《中國印度見聞錄》之上,當中就提及:「在商人雲集之地廣州,中國官長委任一個穆斯林,授權他解決這個地區各穆斯林之間的糾紛;這是按照中國君主的特殊旨意辦的。每逢節日,總是他帶領全體穆斯林作禱告,宣講教義,並為穆期林的蘇丹祈禱。」而被委任嘅穆斯林就稱為蕃長,由蕃坊嘅外商,推選辦事機構叫蕃坊司。蕃坊司以自治為原則,但須受唐廷認可同約束,主要職責係管理蕃坊事務,招徠海外商人,處理宗教問題及解決蕃坊內嘅糾紛,仲會代表蕃舶向政府交納關稅、查禁違運品同負責外商朝貢事宜。
所以話,唐代嘅廣州已經相當國際化。
原圖嚟自網絡