前幾日復活節期，阿史就有唔少朋友過咗大海去澳門，不過見到佢哋啲相真係好多人，阿史就問友人們你哋出入境有無困難，佢哋就話因為買套票所以就無往來迫人嘅問題，真係精明消費者。
今時今日香港人去澳門都可以話相當方便，除咗班次頻密嘅快船，港珠澳大橋開通後又可以坐金巴，甚至坐直升機。咁响以前香港人又點過大海呢？當然係坐船啦，不過就唔係水翼船同噴射船，而係輪船。以往珠三角地區水路交通發達，因此就有航班從廣州開往順德、中山、澳門同香港，由於香港响上世紀三十年代禁賭，因此就有好多香港人坐船過澳門搏殺。响五十至七十年代，就有唔少好出名嘅客輪，好似佛山、大來、德星、利航等，呢啲船分別以蒸氣及燃油推動，船速自然較慢，由澳門內港坐到去香港上環就要成三四個鐘。船程咁長，所以响船上就有小販叫賣提供飲食，當然輸晒個啲就餓住返香港。
不過响後嚟賭牌易手，澳娛就响外港發展水翼船服務，大大縮短港澳往來船程時間，而呢啲坐幾個鐘嘅大船响九十年代就被淘汰喇！
原圖嚟自網絡