最近睇報道見到在內地已成為天皇巨星的陳偉霆話好似想返香港發展，佢呢幾年响內地好紅，好似前幾年唱咗首《野狼Disco》道出咗唔少昔日晚晚去的士高玩嘅一代人嘅美好回憶。
講到的士高，都可以話係改革開放初期响內地相當火熱嘅娛樂場所，而且响全國遍地開花，相信史友們都估到，內地第一間的士高係响廣東地區出現，而最先出現嘅地方就係深圳喇！其實响的士高出現之前，深圳响八十年代初就有以播放流行曲同跳現代舞為主打歌舞廳出現，呢個地方就係响竹園賓館，據歌舞廳前員工講話當時個經理响香港拎咗個電子琴上深圳，加上幾個音樂表演系畢業生，就組成咗歌舞廳演奏樂隊，竹園賓館歌舞廳亦咁掀起一股熱潮，後嚟南洋歌舞廳、向西村西苑歌舞廳出現成為咗深圳人一代回憶。
至於首間的士高就係响香蜜湖度假村出現，呢個的士高有當時流行嘅音響同燈光設備，對當年深圳人嚟講絕對係新奇事物。據當時有去過玩嘅深圳人回憶，話八十年代中期譚詠麟嘅《暴風女神》同《愛情陷阱》一播就全場陷入瘋狂，極受舞池上男女青年嘅歡迎。
原圖嚟自網絡