記得以前去過粵北南雄嘅珠璣巷,當地領隊就話响廣東唔少大家族都係响宋代個陣南遷到嶺南落地生根。的確!响廣東唔少地方嘅大族先祖都係响宋代遷入。
响東莞市有一個景點,叫做南社明清古村落,呢個位於東莞茶山鎮南社村嘅地方,就係由遷居嶺南嘅中原士族會稽謝氏所建,謝氏族人因戰亂南遷,幾經轉折定居於南社,落地生根。而响明清年代,呢條村唔單止有一定規模,而且人才輩出,先後出咗九位進士,另有貢生、舉人16人,秀才29人,係東莞一帶好出名嘅村落。
時至今日,南社村仲保留咗民居、祠堂、書院、店鋪、家廟、古榕、樓閣、村牆、古井、巷道、牌樓,構成咗具有濃厚珠三角特色嘅聚落文化景觀,更難得嘅係好多建築未被破壞,保留咗明清時期面貌,好似保留大量石雕、磚雕、木雕、灰塑同陶塑建築構件,好有藝術價值。所以史友們下次去東莞,不妨去南社村參觀下。
原圖嚟自網絡