相信史友們都知道，蓮塘口岸今年年初開通，令香港人北上又多一個關口可用。而呢個口岸就好近深圳梧桐山，大家去呢個「深圳綠色心肺」遊玩都相當方便。
講到梧桐山，當地就有一間好出名嘅佛寺叫做弘法寺，呢間佛寺雖然唔係千年古寺，但响內地名氣就相當大，有一方面仲係「全國第一」。乜嘢咁巴閉呢？就係寺嘅歷史。話說响八十年代初，深圳市政府就邀請响丹霞山別傳寺出任方丈嘅釋本煥，商討响深圳起一座佛寺，响1985年釋本煥就帶著十位弟子到梧桐山動土灑淨，1990年開始對外開放，成為深圳市內最具規模嘅佛寺。而弘法寺更加係新中國成立以來內地新建嘅首座寺院，而建寺其中一個目的，就係深圳弘法寺毗鄰港澳，面向東南亞，成為內地同海外佛教界聯誼嘅地方，可以話係深圳市响改革開放其中一個標誌項目。
原圖嚟自網絡