最近阿史又睇返劉德華主演嘅《新哥傳奇》,最後一幕佢推住坐輪椅嘅邱淑貞,從山上望落澳門,大有君臨天下之勢,而呢個拍輯之地,其實係澳門呢個城市一個重要嘅地方。
呢個地方位於西望洋山,山上教堂名為西望洋聖堂,又稱主教山小堂,俯瞰整個澳門半島、南灣一帶。呢個教堂建於1622年明代時期,呢個教堂其實係當時一個軍事要點嘅附屬設施,教堂旁原設有炮台碉堡,係當年葡萄牙人為防禦荷蘭人入侵而設立,而駐守炮台嘅士兵就係响呢個教堂做祈禱同彌撒。到咗1892年,附近碉堡拆除後,聖母堂範圍就得以擴大,到咗1935年重建,就發展到現時嘅規模。
呢個教堂响澳門宗教界有好重要地方,每年5月13日,花地瑪聖母像由玫瑰聖母堂出發,遊行至西望洋聖堂進行聖體降福,係澳門重要嘅宗教活動之一。而12月31日除夕晚,由主教帶領進行除夕跨年聖體降福。
不過阿史對呢個地方最深印象,始終係劉德華同邱淑貞拍戲嘅一幕。
原圖嚟自網絡