前幾日五一假期，阿史就勇闖梳打埠去玩一下，仲不忘做文青去咗搵電影景點，包括圖中李小龍去嘅呢個公園。
响《精武門》其中一幕，就講陳真入唔到去「華人與狗不得內進」嘅公園，之後就响門口打低幾個日本人，以前都介紹過，呢個公園就唔係响上海，真係响澳門，叫做白鴿巢公園。白鴿巢公園位於白鴿巢前地，係澳門歷史悠久嘅公園之一，始建於18世紀中葉，原本係葡萄牙富商俾利喇（Manuel Pereira）嘅花園別墅，呢個別墅就租俾英國東印度公司做澳門辦事處，後嚟又再由俾利喇家族成員馬葵士重掌。至於呢個地方之所以叫「白鴿巢」，就係因為呢位馬葵士好鍾意養白鴿，因為太多白鴿响別墅屋簷上，遠睇就好似白鴿巢咁，呢個地方亦因而叫做白鴿巢。响1885年，當時澳門政府收購別墅連花園，仲改建成對外開放嘅公園，亦即係今時今日嘅白鴿巢公園。
講返轉頭，個日最後阿史係無去到呢個地方，因為要趕去碼頭返香港，驚遲到，下次再去搵過。
原圖：《精武門》劇圖