繼續同史友們介紹我國最新嘅考古發現，近日河北省邢台市南和區文保部門就公布消息指，工作人員就喺趙牌村發現一通明代正德十六年石碑，石碑上亦都有重大發現，阿史今次就同大家講一講啦！
今次發現嘅石碑全稱為「明故迪功郎陝西鞏昌府寧遠縣丞南和趙公墓表」，係一塊青石材質，高130厘米、寬75厘米、厚22厘米嘅石碑。呢塊石碑由於有具體年份，所以可以判斷係距今已有502年歷史。而喺石碑之上亦都發現到陽文字字體共854字，至今為止仍然係字跡清晰流暢，上面就有由奉議大夫山西太原府代州知州朱銳撰文，詳細記述墓主人趙思明求學、從政歷程以及趙思明一家三代均以孝行聞名鄉里嘅事跡。
喺清代康熙年間《南和縣志》其實都有記載趙思明、趙進父子孝行事跡，石碑本身就已經有助研究明代中期冀中南地區政治、社會文化。但重要嘅發現唔單止咁，原來喺石碑碑陰部分，仲有完整「趙氏宗支圖」，詳細記載趙氏家族自明代永樂年間從山西榆次遷民至南和縣趙牌村，曾祖之下分列趙氏九代各分支名諱及婚配姓氏。碑文寫得極盡詳實，可以堪稱係一部完整石刻列祖宗親案。
原圖嚟自網絡