繼續同史友們介紹我國歷史上嘅一啲奇人異士，長命嘅人阿史以往都同大家介紹過唔少，但長命到可以足足享有六十幾年榮華富貴、經歷過九任帝皇嘅人，大家又有冇聽過？阿史今次就同大家講一講明朝最長壽駙馬趙輝。
趙輝係明朝駙馬，但其實佢家世本來並唔普通，佢祖父趙應喺明洪武初年以軍功授陝西鞏昌衛正千戶，而佢父親趙各亦都喺永樂初年授府軍後衛正千戶。而趙輝七歲之時，父親就因為征安南陣亡，自己就承襲父親職務。原來按呢個流程繼續落去，趙輝嘅人生或者都唔會有咩太大嘅變化，但喺佢二十幾歲之時，鎮守南京金川門佢就因為狀貌偉麗，被明成祖選配為寶慶公主嘅駙馬。寶慶公主係明太祖朱元璋幼女，所有哥哥都對呢位妹妹十分庝愛，就連嫁妝都係其他公主嘅好幾倍。
自此之後，趙輝就過上咗紙醉金迷嘅日子，自己亦都由一個小官變成公主駙馬，歷任皇帝都對寶慶公主照顧有加。之不過，寶慶公主就喺39歲便因病過世，趙輝仍然有住「駙馬」之名，並且掌管南京都督和宗人府事、監修明長陵、督理南畿馬政近二十年。
呢位明朝最長壽駙馬晚年姬妾成群達到百餘人，出生喺明太祖時期嘅佢，一生歷經明惠宗、明成祖、明仁宗、明宣宗、明英宗、明代宗等帝皇，其中仲有英宗、憲宗曾經復位，所以一共係經歷過九朝帝皇，真係相當誇張！
原圖嚟自網絡