早排阿史就同史友們介紹過「羊車望幸」嘅典故，而其實喺歷史上嘅皇帝由於面對住後宮佳麗三千呢個龐大嘅數目，所以喺決定待寢之時都面對唔少困難，所以佢哋歷史上都發明咗唔少選擇侍寢嘅方法，阿史今次就同大家講一講啦！
古代嘅皇帝除咗會直接點名外，其實仲會通過各類手段等宮中妃嬪主動去爭奪呢個機會，例如就有「蝶幸法」。顧名思義就係通過令到嬪妃頭上插滿鮮花，再由帝皇親自將蝴蝶放飛，最終就睇蝴蝶飛到邊個頭上而決定邊個可以得到皇帝嘅寵幸；類似嘅方法仲有要讓嬪妃們爭相撲捉流螢嘅「螢幸」法等等。
至於靜態一啲嘅方法亦都有唔少，其中一種就係翻牌子，呢個亦係歷朝歷代帝皇都鍾意用到嘅一種方法。通常敬事房嘅太監都會收集十幾個牌子由皇帝選擇，但如果妃子人數眾多嘅朝代，呢種方法就會相當困難。除此之外，其實歷史上仲有好似唐玄宗咁樣唔想費神嘅帝皇，會通過召集所有妃子擲骸子，最終由點數最多嘅人獲勝，繼而決定侍寢對象。只可以話，只有我哋諗唔到，冇佢哋做唔到嘅。
原圖嚟自網絡