喺唔少影視作品當中,只要一有進入古墓、黑夜偷入書房嘅情節,大家都經常會見到賊人拎出一樣工具,只要輕輕一吹呢樣工具就會隨即燃亮,可以起到照明以及點火之用。呢樣工具名為「火折子」,但到底點解古代會有呢種咁神奇嘅工具出現,性能甚至仲比得上打火機?阿史今次就同大家講一講啦!
呢種名為「火折子」嘅工具據了解就喺南北朝社會動盪不安之時一位北齊官女發明,後來就只有貴族之間先會使用。一般嚟講就係以粗糙嘅土紙捲成緊密嘅形狀,部分高級少少嘅仲會放入紅署蔓、濕棉花喺當中,曬乾之後就加入硝、硫黃、松香、樟腦等助燃物。使用之前就先將火折子點燃繼而吹熄蓋上,任由火星喺竹筒之內,每當要使用之時再打開竹筒向內吹氣。呢個原理其實就係令到本身已經燃燒嘅「火折子」喺半燃半滅狀態之下,重新得到氧氣燃燒,成個過程就只係一個復燃嘅過程,並唔能夠好似打火機咁樣隨意生到火,但呢一點已經充滿古人嘅智慧喺當中,絕對係一樣有意思嘅發明。
原圖嚟自網絡