繼續同史友們介紹我國最新嘅考古發現,近日喺河南鄭州舉行嘅中國考古•鄭州論壇上,中國社會科學院考古研究所就公佈咗一項重大嘅消息,就係河南鄭州新砦遺址有可能就係考古學界尋覓已久嘅夏代早期都城。
為咗解答夏朝到底係咪存在呢個問題,歷年嚟無數嘅考古學家都付出唔少青春同汗水,所以近日中國社會科學院考古研究所公佈嘅呢個消息對考古學界嚟講係相當重要。呢次研究嘅河南鄭州新砦遺址位於河南省新密市劉砦鎮新砦村,總面積約70至100萬平方米。遺址早於1999年及2000年就曾經由北京大學古代文明中心與鄭州市文物考古研究院合作發掘,最終就確認遺址以富含晚於河南龍山文化又早於二里頭文化「新砦期」過渡性遺存而著稱。咁到底喺「夏商周斷代工程」當中,呢個遺址又可以算係邊個朝代呢?
據考古團隊喺2002至2005年對遺址再次進行嘅發掘工作嚟講,唔單止搵到城牆、護城河、外壕、內壕及「新砦期」大型建築等重要遺跡,甚至仲發現到彩繪鳥形權杖頭、龍首紋器蓋、蟠龍紋圖案以及玉圭等文化,呢啲都係夏代早期都邑物化載體,再加上有住西元前2000年龍山文化晚期城牆以及西元前1850至1750年間「新砦期」城址,就更加可以推斷呢個遺址極有可能係夏代早期都城,呢個就已經係相當振奮學界嘅一個消息。