提起南宋最強嘅軍事人物,可能唔少史友都只會諗起岳飛。岳飛固然有佢出色嘅地方,但喺岳家軍當中,其實有一位名將孟珙,佢所建立嘅防禦體系為南宋續命幾十年,而佢本人對戰金軍、蒙古更加未嘗一敗。
孟珙出生將門,曾祖孟安、祖父孟林都係岳飛部將,自幼就耳濡目染,喜習武藝,愛讀兵書。亦都因為自細就熟讀兵法,所以喺嘉定十年之時,金軍喺團山一帶想入侵樊城,佢就建議父親喺羅家渡附近設伏,結果成功殲滅金兵近萬人。孟珙嘅厲害之處唔單止係料敵如神,喺棗陽保衛戰中,佢憑住自己精湛射技殺死多個金兵頭目,亦衝鋒陷陣救出自己被困嘅父親,所以好快佢就被提升為副尉。嘉定十四年孟宗政病死,孟珙就被提升為京西第五正將、棗陽軍總轄,管理一支「忠順軍」。喺蒙古聯宋滅金過程中,佢就係負責率兵北上支援,唔單止多次將金兵打到落花流水,最後仲攻下金國最後堡壘蔡州,將金哀宗屍體一分為二,一雪靖康奇恥。
喺呢個過程當中,孟珙深知遲早都會同蒙古開戰,聯合只係為咗拖延開戰時間,增強己方軍力。所以,佢先係收編金鄧州守將移刺璦部,為南宋朝廷增添五縣、二十二鎮、一萬四千名步軍,獲得人口十二萬三千人。
喺消滅金國之後,南宋權臣想乘蒙古軍隊撤退之際,出兵攻取開封、洛陽等地,結果就畀咗蒙古一個開戰嘅理由。端平二年(1235年),蒙軍分三路南侵。之不過,無論係端平三年蒙古軍隊進攻蘄州、嘉熙元年蒙古元首窩闊台可汗再派口溫不花部、察罕部南侵定係蒙古將領塔海率軍號稱八十萬攻打四川等等,都一一被孟珙抵擋,甚至仲收復部分失地。
為咗防止日後蒙古軍隊入侵,孟珙向朝廷提出「藩籬三層」軍事防禦措施,即係喺京湖、四川戰區建立三層外圍防線 ,依靠呢個防禦體系,南宋喺蒙古人攻擊下堅持咗30多年,孟珙堪稱南宋最強名將!
原圖嚟自網絡