近年嚟我國賀蘭山東麓就已經發展成著名葡萄酒產區，「賀蘭山」葡萄酒更加喺多個國際權威葡萄酒大賽打響名堂，真係國貨之光。提到「賀蘭山」呢個地名，網絡上近日都有唔少網民討論，到底盛產葡萄酒嘅「賀蘭山」係咪岳飛「踏破賀蘭山缺」當中嘅「賀蘭山」？呢個就真係天大嘅誤會喇！
此「賀蘭山」絕對非彼「賀蘭山」！盛產葡萄酒嘅「賀蘭山」位於寧夏，但考古實證嘅「踏破賀蘭山缺」地點實際上就係邯鄲磁縣，兩者真係差天共地。「踏破賀蘭山缺」一句出自南宋抗金名將岳飛《滿江紅·怒髮衝冠》，由於詞作當中豪情激昂，慷慨悲壯，歷年嚟都係唔少文人雅士、歷史學者嘅研究對象，當中「賀蘭山」呢個地名更加引起唔少學者嘅爭議。
據清初沿革地理學家顧祖禹喺《讀史方輿紀要》當中指出，歷史上名為「賀蘭山」有兩個地方，一個係寧夏中部，一個就係河北磁縣。河北磁縣嘅「賀蘭山」據《磁州志》記載就係「袤七十里，廣六十里，為豫省門戶。驛路通京畿、陝西、湖廣、廣西、雲南、貴州」，係扼南北要塞，堪稱雄關嘅兵家必爭之地。以上種種因素自然令到呢度成為著名嘅戰場，而宋金交戰時亦都有多場戰役喺呢度發生，所以《滿江紅·怒髮衝冠》當中嘅「賀蘭山」自然就係邯鄲磁縣！
至於岳飛一生由宣和四年至靖康元年就先後六次經過磁州、通過「賀蘭山」，「賀蘭山」更加係岳飛駐兵岳城時之練兵場，激動人心嘅《滿江紅·怒髮衝冠》就係由此而生。
原圖嚟自網絡