阿史之前都提及過，因最近通返關所以就去咗澳門一趟，亦由於無晒錢所以就响走之前求其食咗個葡國雞飯。點解？因為葡國雞係澳門最地道美食，响葡國（即葡萄牙）都好難搵到。
點解咁講呢？嚴格嚟講，葡國雞係屬於澳門葡國菜。眾所周知，澳門响一段長時間被係葡萄牙作殖民管治，所以過去就有唔少葡萄牙人來往澳門同歐洲之間，以往葡萄牙商人除咗同中國做生意，仲會响東南亞一帶購買香料運到歐洲賣，而部分商人就將香料帶到去澳門。响澳門生活嘅葡萄牙人就咁慢慢將唔同嘅食材（尤其是香料）、唔同嘅煮食文化帶到澳門。後嚟一啲澳門當地廚師（主要係華人女傭）就以來自印度嘅咖哩粉、來自馬來亞嘅椰漿、黃薑粉、丁香等泡製各種中西合壁嘅菜式，其中一款就係葡國雞。有趣嘅係，煮葡國雞用上嘅香料响歐洲非常昂貴，唔係正宗葡國菜用到嘅食材反而响遠東嘅澳門香料格價唔算太高，所以葡國雞呢類澳門式葡國菜變成澳門獨有。類似菜色仲有非洲雞，真係環球美食系列！