繼續同史友們介紹我國各地嘅歷史建築趣聞，明十三陵顧名思義就係因為當中有十三位帝皇陵墓而得名，咁當中正常嚟講除咗有皇帝墓之外就只會有妃子墓，但到底點解一個規格咁高嘅陵墓當中，竟然會有一座太監墓？
明十三陵自永樂七年（1409）五月始作長陵，去到最後一帝崇禎葬入思陵止，230幾年間就足足修建咗十三座皇帝陵墓，當中仲有七座妃子墓，以上都係相當合理嘅存在，但太監墓嘅主人到底又係邊個呢？呢個太監墓主人名為王承恩，係崇禎皇帝時期司禮監秉筆太監，早喺崇禎兒時佢就負責照顧崇禎，佢亦以崇禎以及國家利益為首位，所以相當得到崇禎重用。
而喺崇禎十七年，王承恩臨危受命負責提督京營，但最終都難以抵擋闖王李自成嘅軍隊攻破北京。喺天明之際，所有妃嬪自縊殉國之後，崇禎皇帝就係喺太監王承恩陪伴之下自縊身亡。喺目睹崇禎死後，王承恩行完三拜九叩之禮後，自己亦都喺老槐樹旁邊嘅海棠樹上自縊身亡。
佢哋嘅遺體喺幾日之後被發現，李自成就命人將崇禎皇帝及皇后周氏合葬於思陵，至於王承恩亦被破格埋葬喺思陵旁邊，咁就係點解明十三陵中會有一座太監墓嘅原因喇！
原圖嚟自網絡