講到廣東一帶賭博業，可能史友們會諗起澳門。咁多年以來，澳門都有東方蒙地卡羅之稱，不過，响曾經一段時間，東方蒙地卡羅呢個地方，其實係深圳。
深圳呢個地方，多年嚟都唔算好繁榮。不過後嚟九廣鐵路通車後，深圳墟就慢慢發展起嚟，而响民國時期，有一個叫張壽嘅人在深圳墟內開辦一家攤館，招引港客聚賭，可以話係深圳開賭一個開始。而响二十年代，深圳賭業有一個新發展，因為廣東省政府見禁賭禁唔住，於是就實行合法化，持賭牌者可經營賭坊，就係咁一啲賭坊老闆就响深圳開分店。而到咗三十年代，因為省城個邊又實行禁賭，所以好多賭坊直接將大本營搬咗去深圳，有趣嘅係，當年主理廣東軍政嘅陳濟棠，响省城就禁賭，但佢大哥陳維周就响深圳開咗間深圳大飯店，賭同色情事業都有。不過，响1936年南京政府接掌廣東軍政大權後，深圳一眾賭坊就陸續移師去澳門經營，自此深圳就再同賭業無咗關係喇！
原圖嚟自網絡