繼續同史友們介紹世界各地最新嘅文物狀況，對聖經熟悉嘅史友可能都會聽過現存最古老嘅希伯來聖經就係「沙遜抄本」(The Codex Sassoon)，而呢本珍貴嘅聖經就喺過去嘅星期三進行拍賣，並且係拍賣會史上最高成交金額嘅書本及文件之一。
「沙遜抄本」嘅歷史可以追溯到九世紀末至十世紀初，係迄今為止發現最早、最完整希伯來聖經。早喺1989年呢本「沙遜抄本」就係由瑞士金融界收藏家Jacqui Safra所有，而呢次拍賣會據講成功拍到呢件文物嘅買家就係曾任美國猶太人委員會主席嘅Alfred H. Moses，據指佢打算將呢本逾1,100年歷史嘅文物，捐贈畀位於以色列特拉維夫嘅猶太民族博物館(ANU Museum of the Jewish People)。
希伯來聖經「沙遜抄本」(The Codex Sassoon)以3810萬美元(折合約2.98億港元)價格售出，驚人嘅價格甚至仲超級咗微軟創辦人蓋茨於1994年以3080萬美元投得嘅達文西(Leonardo da Vinci)「萊斯特手稿」(Codex Leicester)，真係誇張！
原圖嚟自網絡