最近阿史個老友响社交網體晒咗張美食照,話响深圳食咗條潮式烏頭魚好正云云,阿史就同佢講,下次食烏頭其實可以坐一陣車去虎門食。
廣東人鍾意食烏頭魚相信大家都知,阿史都介紹過香港元朗有出產烏頭,打冷食烏頭亦係唔少人鍾意。好喇!點解食要去虎門呢?烏頭魚原來係出產於廣東虎門太平嘅一種鹹淡水魚類。呢種魚响秋冬時份啲肉會有一層黃油,所以烏頭又稱為太平黃油鯽。最初烏頭產量好少,後嚟成功實現養殖後就成為當地佳餚,而廣東其他地方亦跟住養殖。不過咁,廣東唔少地方烏頭都會帶有泥味,因為烏頭係响淡水養殖時會生長得比較快,但淡水會有水藻,烏頭食咗水藻就會有異味,亦即係泥味。相對而言,虎門因為係鹹淡水交界之地,就可以解決咗呢個問題,呢個亦係虎門烏頭魚出名嘅原因之一。至於係咪真係咁特別,史友們不妨點評一下。
原圖嚟自網絡