繼續同史友們介紹世界各地嘅一啲另類文物，唔知大家有冇諗過名人嘅簽名到底可以值幾多錢呢？近日蘋果公司已故創辦人喬布斯(Steve Jobs)嘅一張簽名支票叫價已破38萬元，到底當中有咩特別之處？阿史今次就同大家講一講啦！
今次進行拍賣嘅呢張支票係喬布斯為數唔多並且帶有簽名嘅物品，呢張支票簽署嘅年份係1976年7月8日，面額係175美元。雖然呢件拍賣品睇嚟嘅唯一亮點好似淨係得喬布斯簽名，但實情唔止咁簡單！支票簽署嘅年份係1976年，呢一年正正就係蘋果公司成立嘅年份，而且支票嘅抬頭更加係用到蘋果公司最原始名稱「Apple Computer Company」以及第一個官方地址「770 Welch Rd., Ste. 154, Palo Alto」，亦即係喬布斯屋企嘅車庫。可以話，簡單嘅一張支票，就見證咗喬布斯以及蘋果公司嘅歷史。
呢張支票原本預期只係2.5萬美元售出，但經過23次競標出價，現已被叫價到5萬美元(折合約38.9萬港元)，足足係支票原價值逾303倍。
原圖嚟自網絡