繼續同史友們介紹世界各地最新嘅考古發現，近日克羅地亞札達爾大學（Sveučilište u Zadru）考古團隊就去到亞得里亞海（Jadransko more）進行水下考古。結果就喺呢次水下考古過程中發現到一個7千年前聚落及「人工通道」。
今次嘅水下考古就係喺亞得里亞海嘅柯爾丘拉島（Korčula）周圍海域約4到5米深進行，喺發掘過程中考古團隊就發現到一條由石塊鋪設嘅通道，一路由柯爾丘拉島連接到古時嘅一座人工島上。整條通道寬度約4米、都係由石塊精緻地拼接而成。經過考古團隊進行放射性定年法後，大致可以確定成個區域嘅歷史可以追溯至公元前4900年前，亦即係7000年前嘅新石器時代。換言之，呢個通道所連結嘅極有可能就係亞得里亞海東部沿岸嘅新石器時代文化「赫瓦爾史前文化」（Hvar culture）。
除咗有呢條重要通道被發現之外，考古團隊仲喺島上嘅另一側搵到有同一時期嘅聚落遺址以及一啲生產工具，呢次發現對研究人類祖先點樣應對環境同氣候有住重大嘅研究價值。
原圖嚟自網絡