如果史友經常去廣州,咁就一定知道天河區有個天河城,而响以前呢個地方都會被稱為「吉之島」。對於唔少廣州人而言,呢個地方可以話係廣州一個地標,仲見證住天河區嘅發展。
吉之島本身係一個嚟自日本嘅百貨零售企業,係永旺集團旗下一個品牌。早於上世紀七八十年代就進軍香港,仲响香港上市。而响九十年代,永旺集團就進入內地市場,仲响廣州作為據點。1995年,廣東吉之島天貿百貨有限公司成立,並响1996年於廣州天河城廣場開設首間旗艦店天河城店,而呢間百貨公司就叫做吉之島。由於九十年代天河區係廣州重點發展新區,新派建築同新嘅城市規劃令到呢個地方成為一個興旺商業區,天河城同吉之島成為唔少年輕人會去行街購物之地。特別係响1999年廣州地鐵一號線通車,天河城位於體育西路站,大大刺激人流,就係吉之島呢間百貨公司成為廣州市一個著名地標。到咗今時今日百貨公司改咗名,但啲人都會照舊咁叫。
原圖嚟自網絡