嘩嘩嘩，呢次真係我國水下考古史上又一次嘅重大發現啊！據國家文物局、海南省人民政府公布，我國喺南海展開嘅水下考古工作取得重大進行，喺南海水域就發現到兩處古代沉船以及超過十萬件文物。
早喺2022年10月，我國南海西北陸坡約1500米深嘅海域就發現到有兩處疑似係古代沉船嘅痕跡。而喺今年5月20日，當局就完成咗沉船水下測繪基點布放以及進行過相關嘅調查，結果就有咗以上嘅重大發現。
據介紹，其中一個沉船位置就被定名為南海西北陸坡一號沉船，當中有多個被船艙分隔嘅瓷器文物堆，最高嘅文物堆高度達到3米幾，散落嘅範圍達到上萬平方米。由呢個咁誇張嘅範圍推測，估計相關嘅文物多達十萬件，並且都係屬於明代正德年間（1506—1521）。
另一個沉船就被命名為南海西北陸坡二號沉船，當時就發現到大量尺寸相近嘅原木，推斷呢艘就係古代從海外裝載貨物駛往中國嘅沉船。水下考古嘅工作困難重重，目前南海博物館將嚴格按照水下考古工作規程，用1年左右時間分3個階段實施一號、二號沉船遺址考古調查工作。雖然兩處古代沉船以及文物嘅歷史仲需要更多時間研究，但呢個發現已經堪稱係世界級重大考古發現，真係相當令人振奮！
原圖嚟自網絡