喺歷史上成為「最後一位」往往都係一件好悲哀嘅事,例如「最後一位皇帝」、「最後一位太監」以至係「最後一位狀元」。呢次阿史要介紹嘅就係清朝最後一位狀元劉春霖,佢嘅家世可憐,好不容易考上狀元就遇上清朝滅亡,後來又因為狀元身份更被日偽政權拉攏,咁到底佢係如何保住自己嘅晚節?阿史今次就同大家講一講啦!
劉春霖係晚清直隸省河間府人,佢出生喺一個家世貧寒嘅家庭,父親係喺府衙當差、母親就係知府家中嘅奴僕,佢自己就由哥嫂撫養。而劉春霖自己亦都相當爭氣,喺科舉制度廢除前1年(1904年)考上甲辰科狀元,名乎其實就係中國歷史上最後一位狀元。喺佢及第之後,佢就被初授翰林院修撰,之後與同科進士商衍鎏(探花)、譚延闓、沈鈞儒奉派到日本法政大學留學,歸國後先後擔任資政院議員、記名福建提學使和保定北洋女子師範學校監督等職位。
直到1912年宣統退位後,劉春霖亦曾經出任過袁世凱、黎元洪、馮國璋、徐世昌等人總統府內史,但後來又因為眼見軍閥混戰、政治腐敗而令佢決心辭官。喺七七事變爆發後,日軍佔領咗北平,當時同科進士王揖唐登門拜訪想佢出任北京市市長要職但遭到拒絕,及後日本人亦都多次以滿洲國教育部長、北平市市長等偽職誘惑劉春霖,但佢隨即大怒並且表示自己「寧作華丐,不當漢奸」。
強硬嘅態度亦都令到日本人向佢展開報復,佢家中嘅書畫珍寶都被洗劫一空,而佢最終亦都因為心臟病突發去世,終年70歲。
原圖嚟自網絡