講到順德，唔少史友應該會諗起好多美食，而順德其中一道名菜就係家鄉釀鯪魚。講到家鄉釀鯪魚，之前食安中心响臉書度仲介紹過，話鯪魚屬於水銀含量相對低嘅魚，仲提供埋一道「家鄉煎釀鯪魚」食譜，認真犀利。
講到家鄉釀鯪魚，源於當地係漁米之鄉，當地嘅鯪魚肥大鮮味，所以成為食材。而家鄉釀鯪魚嘅出現同一個孝子故事有關，相傳順德西南部均安鎮，有位孝子名叫萬讓，由於佢爸爸好鍾意食鯪魚，但鯪魚骨多容易令人骾骨，於是萬讓就將鯪魚起骨，只留魚皮，再將魚肉剁碎成蓉後以生粉、葱粒等拌勻，釀返上去魚皮當中再煎熟，切段後砌回魚嘅原狀。由於呢道菜式保留鯪魚鮮味之餘，老人家食個陣又唔怕骾骨，所以大受歡迎。當地仲有一個講法，話「煎釀鯪魚」個「釀」係由萬讓個「讓」字演變而嚟，孰真孰假就真係無從稽考。
原圖嚟自網絡