嘩嘩嘩，呢個真係一個相當重磅嘅消息，香港故宮文化博物館昨日就公布，正式同四川省博物館及研究院簽訂展覽意向合作協議，喺今年9月底就會推出「凝視三星堆—四川考古新發現」特別展覽。
咁呢個展覽又有咩咁威水呢？就係全球注目嘅三星堆文物將會嚟到香港故宮展出！呢個展覽將會由香港故宮、四川廣漢三星堆博物館及成都金沙遺址博物館聯合主辦，展覽會以120件距今2600至3300年嘅青銅器、玉器、金器及陶器等文物作為展出，而其中最新發現嘅距今3000至3200年嘅各類青銅面具、青銅人像、黃金面具以及從未在外展出嘅「玉鉞」等文物就會係今次展覽嘅重點展品，真係睇頭十足！
除此之外，協辦方四川省文物考古研究院及成都文物考古研究院就唔單止會舉行展覽，仲會有一系列以古蜀文明為主題嘅學術研討及公眾教育活動，岩晒所有鍾意古蜀文明嘅市民參加！
原圖嚟自網絡