喺以冷兵器盛行嘅時代，威力龐大嘅火器自然可以喺戰場上取得優勢，但最初嘅火器受制於更換子彈嘅困難並未得到廣泛嘅運用。之不過，其實喺清朝歷史上就曾經有一位火器天才研發出「二十八連珠火銃」，本來可以改變唔少戰局，但奈何一直都冇得到重用。
呢位清朝康熙年間嘅火器天才名為戴梓，自號耕煙老人。出生喺官吏世家嘅佢自小就天資聰穎，喜歡機械製造，曾經自製過多種火器，其中更有一種可以打中過百米嘅目標。而喺佢嘅發明當中，據傳就曾經有過「二十八連珠火銃」。呢樣發明喺當時以單發為主嘅火器時代直頭係堪比「機關槍」嘅存在，假如能夠被朝廷好好利用，必然係會帶嚟唔少戰場上嘅優勢。
之不過，喺戴梓完成呢項發明冇耐，曾經以八日時間私自製作出「衝天炮」嘅戴梓，就因為呢個舉動得罪推銷比利時「衝天炮」嘅傳教士南懷仁，而被佢聯同張獻忠養子扣上「私通東洋」嘅罪名。最終，戴梓就被康熙流放到盛京，經歷三十幾年後先至得赦回京，但佢所發明嘅火器幾乎冇一得到清朝重用。
原圖嚟自網絡