喺唔少影視作品當中,相信部份史友都會留意到一點,就係佛寺當中嘅和尚喺施禮念經之時都會用上雙手,但唯獨係少林寺入面嘅和尚先至會用上單手施禮。到底當中有咩原因?阿史今次就同大家講一講啦!
雙掌合十禮喺印度佛教嚟講係日常見面嘅禮法,喺古代印度社會嚟講,右手代表神聖而左手代表不淨,兩者結合之下就等同以真面目示人嘅意思。而呢種禮法經過千年發展同演變之下,又產生出平等、不二、合心、不亂等等嘅含意。咁問題嚟喇,到底單手施禮同雙手施禮又有咩分別?點解就只有少林寺和尚先會單手施禮呢?
其實喺本質上嚟講,單手施禮以及雙手施禮本質上係冇分別,而少林寺和尚之所以咁做全因為佢哋都共同紀念緊一個人,呢個人就係漢傳佛教禪宗二祖慧可大師。相傳慧可大師就係達摩祖師嘅徒弟,喺最初慧可向達摩所在嘅少室山求法之時,達摩祖師婪本就唔理佢,直到慧可大師朝夕相待、喺冰雪當中斷臂求法,先至成功打動達摩祖師,繼承祖師衣缽。少林寺嘅後人為咗紀念慧可禪師斷臂求法,於是少林寺和尚都係單手施禮。
原圖嚟自網絡