今時今日去廣州玩，如果要住酒店嘅話，可能會揀天河區珠江新城個邊啲新酒店，又或者會入住荔灣區沙面個邊白天鵝賓館、勝利賓館之類，其實廣州仲有唔少值得大家一去嘅酒店，廣州迎賓館就係其中之一。
位於廣州市越秀區嘅廣州迎賓館，有人就以「半個廣州史」嚟形容，因為呢個地方絕對係廣州城發展嘅見證。廣州迎賓館最初原址為任囂廟，到咗南梁時期建寶莊嚴寺；北宋時改為淨慧寺。到明代洪武年間就改為提督府，正式成為政府機關建築物。到咗清順治年間耿繼茂將呢度改建為靖南王府；康熙年間建成將軍府。到咗咸豐年間就被英國強佔成為英國駐廣州領事館。
到咗民國時期，當時國民政府就响1928年收回英國領事館，1931年修建為別墅，始稱蘭園迎賓館，後嚟繼續擴建迎賓館，專門接待軍政要員。而响國民政府敗走台灣前，呢度一度成為「總統府」，解放後就成為招待所，响1956年正式更名為廣東迎賓館。
亦因為廣東迎賓館歷史地位特殊，所以多年來都係廣東省政府接待國內政要同海外貴賓之地，接待過嘅國家領導人包括毛澤東、周恩來、鄧小平、董必武等，海外貴賓就包括金日成、胡志明、西哈努克、尼克遜、李光耀、基辛格等。所以話廣州迎賓館歷史地位一啲都唔簡單。
原圖嚟自網絡