如果提起漢朝嘅名將，相信唔知史友都會諗起衛青、霍去病以及有「飛將軍」之稱李廣等名將，佢哋能夠喺歷史上留名都係因為佢哋曾經有過出色嘅戰功，而李廣一生就係主要同匈奴作戰足足四十幾年，大小戰爭七十幾場，佢嘅威名甚至仲得到司馬遷以及後世唐朝詩人嘅傳頌。之不過，一位咁出色嘅將領即使有過咁多戰功，去到死嗰日都仲未被封侯，到底當中有咩原因？阿史今次就同大家講一講啦！
李廣係秦朝名將李信嘅後人，喺《史記·李將軍列傳》當中就有記載，「李廣身高過人，猿臂善射，愛惜士卒」。佢自少就精於射藝，甚至仲可以一箭穿石、一箭殺虎。漢文帝十四年匈奴大舉進犯，李廣參軍抗擊匈奴，因為精通騎射好快就被提升為郎官，年紀輕輕後來仲成為埋騎常侍。佢嘅表現甚至仲令漢文帝直言「可惜你沒生在高祖時代，不然的話封個萬戶侯不在話下！」
勢估唔到嘅係，漢文帝呢句說話亦都真係成為李廣嘅結局。對軍人嚟講，封侯晉爵本來就係最大嘅願望，但壯年時嘅李廣就先因為喺七國之亂期間接受漢景帝胞弟梁王授予將軍印信而引發皇帝大為不悅，即使喺亂世奪取叛軍軍旗立下赫赫戰功，李廣都係冇任何封賞。而喺後來漢武帝即位後，經歷過隴西、雁門、代郡、雲中等各邊郡太守之任嘅李廣就被任命為衛尉，並喺西元前一二九年聯同公孫敖、公孫賀、衛青四將同時出擊入侵嘅匈奴大軍。但點知呢次李廣遭遇匈奴主力，一萬騎兵全軍覆沒，自己亦都差啲被俘。
西元前一一九年，當時已經超過六十歲嘅李廣幾乎再冇機會封侯，喺佢苦苦哀求之下，佢成功可以參與對匈奴發動漠北總攻，亦係佢最後一戰。之不過，喺呢一戰當中，李廣本應就係與衛青主力部隊會師合擊匈奴單於本部，但李廣因迷路延誤軍機，本應按律當追究其罪責嘅佢最終不甘「受刀筆小吏污辱」而拔刀自刎。一代名將「飛將軍」李廣就係咁樣留下咗「李廣難封」嘅故事。
原圖嚟自網絡