相信史友們都必定知道，清朝皇帝乾隆死後就被埋葬喺裕陵，但奈何佢喺呢個皇家陵墓當中都不得安寧，佢所在嘅地宮就被孫殿英盜竊，唔單止地宮內嘅文物被盜得一乾二淨，佢嘅遺骸甚至仲被挖咗出嚟，地宮亦都因為受到破壞而曾經長年積水，真係相當陰公。
喺唔少影視作品當中，偷竊他人陵墓之人都唔會有咩好下場，咁喺現實當中又有冇呢回事呢？乾隆陵墓當中曾經係有一把九龍寶劍，喺呢把寶劍被孫殿英偷走之後轉輾就落入幾個人手中，但最終呢幾個人都冇乜好下場！
喺孫殿英盜墓之後，佢為咗防止自己被追究刑責，所以識時務嘅佢都將唔少清朝陵墓嘅文物周圍送畀人，而乾隆地宮嘅九龍寶劍佢就先係送咗畀陸軍中將戴笠。戴笠拎到呢把寶劍之後就未交有畀蔣中正，反而係畀自己手下馬漢三保管。但點知馬漢三喺張家口偵察嘅時候就被日偽發現，佢隨即投降並且將呢把寶劍交出。
拎到呢把寶劍嘅山西派遣軍參謀田中隆吉自此喺山西就接連打咗幾場敗仗，氣急敗壞嘅佢就將寶劍送咗畀川島芳子。而冇幾耐抗戰勝利後，川島芳子就被捕，寶劍又重新返到戴笠手上。而戴笠喺1946年3月16日從天津坐飛機到上海之後，就帶咗呢把寶劍上機，後來亦都不幸遇上空難身亡。寶劍最後嘅下落據原軍統沈醉喺《我所知道的戴笠》當中寫到，就係作為陪葬入咗戴笠嘅墓。
原圖嚟自網絡