記得細個個陣，讀中文有課書叫「楊修之死」，大概係話東漢末有個才子楊修，恃才傲物得罪咗曹操，最終曹操以「雞肋」一事將楊修治罪處死，而《三國演義》同唔少影視作品都係咁樣表述。不過，楊修嘅死其實同「雞肋」一事無太直接關係。
相信史友們都知，曹操响漢中之戰進退不得，唔知點算時就將軍中暗號定為「雞肋」，被楊修指破為「食之無味廢之可惜」，推測曹操有意撤兵，結果曹操以擾亂軍心罪名將佢處死，呢個就係「雞肋」嘅故事。不過，响史籍當中曹操處死楊修係因為另一件事。據 《後漢書·楊震傳附玄孫修傳》引《續漢書》所載，話楊修同曹植飲醉後一齊坐馬車，擅闖司馬門，仲誹謗曹彰。曹操知道呢件事之後大怒，於是將楊修處死。至於罪名，據《三國志·魏志·陳思王植傳》引《典略》所載，就係「前後漏泄言教，交關諸侯」。但其實曹操殺楊修背後原因，除咗話佢多次冒犯同怕佢怪壞曹植外，仲有係因為楊修係袁術之甥，慮為後患，因而殺之。
原圖：《大司馬司馬懿》劇照