噚日中國載人航天工程辦公室公布，話計劃响2030年前實現中國人首次登陸月球。嘩！睇到呢個消息，唔知點解突然諗起好多中國古代同月球嘅故事。
講到中國古代同月球嘅故事，自然係嫦娥奔月，呢個故事相傳記載於商代《歸藏》。據《漢魏遺書鈔》記載《歸藏》內容，就話「昔者恆我（姮娥）竊『毋死之藥』於西王母，服之以（奔）月。……『恆我』遂託身於月，是為蟾蠩。」呢個「恆我」後嚟就慢慢演變成嫦娥喇！後嚟啲人仲將呢個傳說增加內容，又加埋后羿射日一齊講。
不過响古代有另一個同月球有關嘅故事，就同依家科幻小說幾類似，就係偶遇「月球人」。到底乜嘢一回事呢？話說唐代有位文學家叫段成式，佢就寫咗一本奇書叫《酉陽雜俎》，响卷一「天咫」就有一段故事，講兩個秀才响嵩山迷路，後嚟佢哋向一個白衣人問路，個白衣人就話佢哋知佢來自月球，仲解釋「月勢如丸」，即月球好似個球體咁，仲有係月球本身唔會發光，係靠太陽照耀月亮凸起之處而發光，更話月球有八萬二千戶人住。
當然！呢個只係段成式寫嘅小說，但因為內容對月球一啲見解同現今天文學好近似，所以就話佢可能真係遇過月球人。無論點，响一千年前能夠寫到咁嘅內容，真係幾厲害。
原圖嚟自網絡