之前阿史講過西漢時中原政權已經有能力派船到今日嘅東南亞同印度一帶。正如阿史之前所講，响隋唐以前中國同其他地方嘅海路交通發展得相當興盛，造船技術已經可以作較長途嘅航行，而且船嘅規模好似比我哋想像仲要勁。
响東晉時期，高僧法顯响佢六十幾歲高齡時到天竺取經。經過多年艱苦旅程，响各地抄經、學習、同畫像，十幾年後返回中土。不過，佢返中原時就唔係循陸路返國，而係海路。據《佛國記》所載，佢响獅子國搭上「商人大舶」東行返國，而呢艘船有成二百幾人，大船拖住小船以備毀壞。可惜行咗三日因遇到風浪而入水，最終行咗十三日到一島邊先有得修補。後嚟航行咗九十日，到咗一個名為耶婆提嘅國家，逗留咗五個月後又坐上另一隻大船，又係坐咗成二百幾人，最後順利返到中土。
史友們可能會問，魏晉時期就有做到載二百幾人嘅船咁勁？其實响漢代中國造船技術已經相當發達，好似或者三國時期方震所著嘅《南洲異物志》，就有記述當時造船嘅規模：「船大者長二十餘丈，高去水者三二丈，翠之妍閣道。載六七百人，物出萬斛。」可以載幾百人，或者載貨萬斛，證明啲船已經相當大隻。
原圖嚟自網絡